شدقيك

طبعا الكل هيقول ان العنوان ده"شدقيك"غلطه كتابيه بس للاسف هو عنوان موضوعنا النهارده0
الحكايه ياجماعه وانا بشيت مع شخص بحترمه وبحبه وبقدره جدا,قالي عباره تخللها كلمه"شدقيك",معرفش ليه اول ماقريتها حسيت اني في تونس وافتكرت فيلم اللمبي لما قالتله الراقصه التونسيه نجلا :"ايش بيك..تكلني بعنيك"وطبعا انتوا عارفين الكاف عند التوانسه عامله ازاي,المهم أنا سالته يعني ايه "شدقيك"مع الاخذ في الاعتبار أن كل كلامه لا يخلي من الجماليات والكلمات من فصيله "شدقيك"0
فقالي :عايز اقولك رايي فيك بصراحه0
قولتله :أنا جاهل!!!!!0
قالي:صحيح0
والمهم طلع ان معني "شدقيك"كما قال لي لاحقا هو:"نهايه الشفه العليا" ,والمقصود طبعا "انك تضحك بقوه"0
بخلاف معني الكلمه اللي انا مش عارف انطقها أساسا ,فأنا بقيت جاهل!!,فهل فعلا انا جاهل بسبب عدم المامي بمفردات لغتنا العربيه؟أم ان لغتنا _العربيه_ لم تعد احدي مقاييس العلم في وقتنا الحاضر؟,أم نحن ظالمون لغتنا العربيه بالقائها علي الرف؟,ام ان اللغه العربيه حالها من حال الناطقين بها وبالتالي فمن الطبيعي أن لا نكون نعرف مفرداتها جيدا0
مش عارف,بس كلمه"جاهل "دي وجعتني أوي,حاصه اني كنت فاهم نفسي بفهم علي الرغم اني أعلم جيدا أني لا أجيد اللغه العربيه أكثر من غيري ,ولهذا تركت كتابه الشعر لاصحابها,وبالتالي فأنا بسيط ولغتي بسيطه ,وعلشان كده لما اتقال "شدقيك"دي فانا ذهلت 0
علي كل حال عايز اعرف رأيكم في الموقف ده ,وهل من الطبيعي أني معرفش معني هذه الكلمه "شدقيك" ,أم ان الكلمه دي ليها ناسها زي مابيقوله وبالتالي فأنا لا أوصف بالجاهل بسبب جهلي بها؟
واخيرا:امانه عليك لما قريت عنوان الموضوع ده"شدقيك"ايه جه في بالك؟